Ligia Grischa

Radunonza generala 2024 –
sguard anavos e prevista

Dumengia sera ein ils commembers dil chor viril Ligia Grischa s’entupai alla radunonza generala. Il president Mathias Pfister ha saviu beneventar la gronda part dils 70 cantadurs. Culla radunonza generala ha il 173avel onn da cant 2024/2025 entschiet. Quel vegn puspei ad esser interessants, ton per cantadurs sco auditori. La stagiun currenta dat ei denton, suenter in onn fetg pulpiu, dameins activitads.

In repertori da 14-20 canzuns, il 12avel onn da cant cun Christoph Cajöri, 16 emprovas, 12 concerts, ella media ina preschientscha da 92,3 %, fetg buna atmosfera generala: quei ein cefras e facits digl onn da cant vargau 2023/24. Mathias Pfister, il president dil chor viril Ligia Grischa, ha saviu trer quella bilanza generala digl onn da cant vargau. Ei seigi stau in onn fetg pulpiu da dimensiun historica. Aunc mai ei il chor viril Ligia Grischa staus tontas gadas avon in publicum en ina stagiun. Cun success eis el separticipaus il fevrer 2024 alla concurrenza svizra da chors a Cuera. Lu ha il chor cooperau alla commemoraziun 600 onns Ligia Grischa cun ina turnea che ha menau a Trun, Glion, Spligia, Mesauc e Domat. En buna memoria resta a cantadurs e dirigent la cooperaziun cul historicher Adolf Collenberg. Il directur ha giu ina rolla dubla en quels concerts da turnea, ha el numnadamein cumponiu la musica dallas scenas.

L’identificaziun ei carschida
Suenter il concert giubilar dils 600 onns Ligia Grischa ella baselgia claustrala a Glion ei il chor separticipaus, cun dus concerts igl 1 da zercladur 2024, ella baselgia s. Margreta, alla commemoraziun 500 onns stadi liber dallas Treis Ligias.Il success alla fiasta da cant districtuala a Trun ei stau ina pagaglia e satisfacziun pils meins vargai. La fin zercladur ha il chor representau, gest avon las vacanzas da stad, la tiara romontscha alla fiasta federala da costums a Turitg.
Gl’onn special da cant 2023/24 ha Christoph Cajöri commentau aschia en siu rapport annual: “Igl ei stau in onn extraordinari nua che nus essan s’anflai”. In applaus extendiu han ils cantadurs fatg ad el. Ei hagi pariu che l’identificaziun cul chor seigi rinforzada, la formaziun seigi carschida ensemen duront quei onn da cant, ha il directur detg. Ils exercezis intensivs cul directur e culla vicedirigenta Rilana Cadruvi han fatg effect. Aschia ha il chor cantau senza notas ina gronda part dil repertori, quei che Christoph Cajöri ha saviu nezegiar. Els hagien sentiu dapli preschientscha ed attenziun dalla vart dils cantadurs, han dirigenta e vicedirigent declarau.

Aunc dus treis onns
Cun grond tschaffen entscheivi el gl’onn da cant niev culla Ligia Grischa, ha il directur sincerau. Suenter 14 onns hagi el numnadamein dau giu siu chor bernes Pro Arte. Il concert da cumiau ei ils 16 e 17 da november 2024 el Müster a Berna ed ils 27 da november 2024 a Bienna. Da quei cumiau vegn il chor Ligia Grischa a profitar. Sco quei che Christoph Cajöri ha sincerau alla radunonza generala, vegn el a restar fideivels al chor aunc silmeins dus treis onns. L’identificaziun dils cantadurs culla litteratura motiveschi el fetg, ha il directur puntuau. Igl ei il cant romontsch. Ch’il chor ei aviarts era per autra litteratura, vegn el a mussar la primavera proxima.

“Der Schlafwandler” da Friedrich Hegar
Gl’onn da cant 2024/25 duei buca finir cun 12, mobein “sulettamein” dus concerts. Quels ein planisai ils 17 e 18 da matg 2025. Il concert dalla sonda ei a Cuera ella baselgia s. Martin, quel dalla dumengia suentermiezgi a Glion ella baselgia claustrala. Quei concert vegnan ils umens dalla Ligia Grischa a dar ensemen culla Scola da cant Surselva che conta sut la direcziun da Rilana Cadruvi. Igl ei puspei ina novaziun: La Ligia Grischa conta l’emprema gada cun ina formaziun d’affons. Tgisà sche enqualin dils babs han muostgas da cooperar?
Il dirigent ha era presentau il program musical dil concert annual. In bloc da canzuns ei dedicaus al cumponist Carli Scherrer permiert. In secund a Gion Giusep Derungs e Gion Antoni Derungs. Denter auter ei “Notg da serenezi” sil program. Igl ei in toc dramatic da quater minutas tenor in text da Flurin Darms. Lu ha il dirigent era presentau ina part voluminusa: Il chor vegn ad elaborar ed exercitar la cumposiziun en lungatg tudestg “Der Schlafwandler” da Friedrich Hegar. Quella ha la Ligia Grischa cantau gia inagada pli baul, lu denton en lungatg romontsch. Quella gada vul Christoph Cajöri prender a mauns cun ses cantadurs la versiun originala. Igl ei in toc da siat tochen otg minutas che vala sco toc da parada per chors virils. “Igl ei buca in toc sempel. Jeu sun denton perschuadius che la Ligia Grischa ei habla da dumignar quella sfida.” Il text dalla cumposiziun ei dil scribent svizzer Gottfried Keller.